ஈரான் மற்றும் அமெரிக்கா-இஸ்ரேல் இடையிலான போர்ப்பதற்றம் அதிகரித்து வரும் சூழலில், ஈரானில் வசிக்கும் இந்தியர்களுக்கு இந்தியத் தூதரகம் மிக முக்கியமான அறிவுறுத்தல்களை வழங்கியுள்ளது. ஈரானில் நிலவும் பாதுகாப்பற்ற சூழலைக் கருத்தில் கொண்டு, அங்குள்ள மாணவர்கள், சுற்றுலாப் பயணிகள் மற்றும் வணிகர்கள் உள்ளிட்ட அனைத்து இந்தியர்களும் கிடைக்கும் வணிக ரீதியான விமான போக்குவரத்து வசதிகளைப் பயன்படுத்தி உடனடியாக அந்நாட்டை விட்டு வெளியேறுமாறு வலியுறுத்தப்பட்டுள்ளது.

தற்போது ஈரானில் தங்கியிருப்பவர்கள் வீட்டை விட்டு வெளியே வருவதைத் தவிர்க்கவும், தேவையற்ற பயணங்களை ரத்து செய்யவும் கேட்டுக்கொள்ளப்படுகிறார்கள். மேலும், போராட்டங்கள் அல்லது ஆர்ப்பாட்டங்கள் நடைபெறும் இடங்களுக்குச் செல்வதை முற்றிலும் தவிர்க்க வேண்டும் என்றும், எப்போதும் தங்களது பாஸ்போர்ட் மற்றும் அடையாள ஆவணங்களைத் தயார் நிலையில் வைத்திருக்க வேண்டும் என்றும் அறிவுறுத்தப்பட்டுள்ளது. ஏதேனும் அவசர உதவி தேவைப்பட்டால், தூதரகத்தின் +989128109115, +989128109109 ஆகிய உதவி எண்களைத் தொடர்பு கொள்ளலாம் எனத் தெரிவிக்கப்பட்டுள்ளது.