தைப்பூசத் திருநாளை முன்னிட்டு திருச்செந்தூர் அருள்மிகு சுப்பிரமணிய சுவாமி திருக்கோயிலில் லட்சக்கணக்கான பக்தர்கள் திரண்டு சுவாமி தரிசனம் செய்தனர்.


இந்த விசேஷ நாளை முன்னிட்டு அதிகாலை முதலே தமிழகத்தின் பல்வேறு மாவட்டங்களில் இருந்தும் பாதயாத்திரையாகவும், காவடி எடுத்தும் வந்த பக்தர்கள் கடலில் புனித நீராடி நீண்ட வரிசையில் காத்திருந்து முருகப் பெருமானை வழிபட்டனர்.


பக்தர்களின் வசதிக்காகக் கோயில் நிர்வாகம் சார்பில் சிறப்பு ஏற்பாடுகள் செய்யப்பட்டிருந்தன. விழாவின் முக்கிய நிகழ்வாக சுவாமி அஸ்திரதேவர் கடலில் புனித நீராடும் தீர்த்தவாரி உற்சவம் நடைபெற்றது. இதனைத் தொடர்ந்து சுவாமிக்கு சிறப்பு அபிஷேகம் மற்றும் தீபாராதனைகள் நடைபெற்றன. பக்தர்கள் கூட்டம் அதிக அளவில் இருந்ததால் திருச்செந்தூர் நகர் முழுவதும் விழாக்கோலம் பூண்டிருந்ததுடன், பலத்த போலீஸ் பாதுகாப்பும் போடப்பட்டிருந்தது. விழா ஏற்பாடுகளைத் திருக்கோயில் தக்கார் மற்றும் இணை ஆணையர் தலைமையிலான கோயில் பணியாளர்கள் சிறப்பாகச் செய்திருந்தனர்.