ஆந்திர மாநில முன்னாள் முதல்வர் ஜெகன் மோகன் ரெட்டியின் நெருங்கிய உறவினரின் திருமண வரவேற்பு நிகழ்ச்சி சென்னையில் நடைபெற்றது.

இந்த நிகழ்வில் தமிழக வெற்றிக் கழகத்தின் தலைவர் விஜய் கலந்துகொண்டு மணமக்களை வாழ்த்தினார்.


அப்போது, அதே நிகழ்விற்கு வருகை தந்திருந்த ஜெகன் மோகன் ரெட்டியும் விஜய்யும் நேரில் சந்தித்துக்கொண்டனர்.

தமிழகத்தில் தவெக என்ற அரசியல் கட்சியைத் தொடங்கி தீவிரமாகச் செயல்பட்டு வரும் விஜய், அண்டை மாநிலத்தைச் சேர்ந்த முக்கிய அரசியல் தலைவரான ஜெகன் மோகன் ரெட்டியைச் சந்தித்தது அரசியல் வட்டாரத்தில் பெரும் கவனத்தைப் பெற்றுள்ளது. இந்தச் சந்திப்பின் போது இருவரும் பரஸ்பரம் நலம் விசாரித்துக் கொண்டனர். இவர்களது சந்திப்பு தொடர்பான புகைப்படங்கள் மற்றும் வீடியோக்கள் தற்போது சமூக வலைதளங்களில் வைரலாகி வருகின்றன. தமிழக அரசியலில் தடம் பதித்து வரும் விஜய், பிற மாநிலத் தலைவர்களுடன் காட்டும் இத்தகைய இணக்கம் அரசியல் ரீதியாக முக்கியத்துவம் வாய்ந்ததாகப் பார்க்கப்படுகிறது.