தமிழகத்தில் விரைவில் நடைபெற உள்ள சட்டசபை தேர்தலை முன்னிட்டு, விஜய் தலைமையிலான தமிழக வெற்றிக் கழகம் தனது தேர்தல் பணிகளைத் தீவிரப்படுத்தியுள்ளது. இதன் ஒரு பகுதியாக, அக்கட்சியின் தேர்தல் பிரசாரக் குழுவினர் தமிழகம் முழுவதும் 10 நாட்கள் தொடர் சுற்றுப்பயணம் மேற்கொள்ள உள்ளனர். இந்தச் சுற்றுப்பயணம் வரும் ஜனவரி 26-ஆம் தேதி சென்னையில் தொடங்கி, திருவள்ளூர், வேலூர், சேலம், கோவை, மதுரை, திருச்சி மற்றும் டெல்டா மாவட்டங்கள் வழியாகப் பயணித்து, பத்தாம் நாளில் புதுச்சேரி, செங்கல்பட்டு மற்றும் காஞ்சிபுரத்தில் நிறைவடைகிறது. தமிழகத்தின் அனைத்து முக்கிய மாவட்டங்களையும் உள்ளடக்கும் வகையில் திட்டமிடப்பட்டுள்ள இந்தப் பயணத்தின் மூலம், கட்சியின் கொள்கைகளையும் தேர்தல் செய்திகளையும் மக்களிடம் கொண்டு சேர்க்க த.வெ.க. திட்டமிட்டுள்ளது.