திருச்சியில் நடைபெற்ற திமுகவின் 12-வது மாநில மாநாட்டில் உரையாற்றிய முதல்வர் மு.க. ஸ்டாலின், வரவிருக்கும் 2026 சட்டமன்றத் தேர்தல் என்பது 'தில்லியா? அல்லது தமிழ்நாடா?' என்பதைத் தீர்மானிக்கும் களமாக இருக்கும் என்று முழங்கினார். திருச்சி மாநகரம் திமுகவிற்கு எப்போதும் ஒரு திருப்புமுனையையும் எழுச்சியையும் தரும் இடமாக இருந்துள்ளதை நினைவுகூர்ந்த அவர், மத்திய அரசு தேர்தலைக் கருத்தில் கொண்டு கூட தமிழகத்திற்கு எந்தவொரு சிறப்புத் திட்டங்களையும் பட்ஜெட்டில் அறிவிக்கவில்லை என்று கடுமையாக விமர்சித்தார்.

தமது உரையில் திமுக அரசின் சாதனைகளைப் பட்டியலிட்ட முதல்வர், அதிமுக ஆட்சியில் 4.13 லட்சம் கோடியாக இருந்த முதலீடுகள் தற்போது திமுக ஆட்சியில் 13.57 லட்சம் கோடியாக உயர்ந்துள்ளதாகவும், ஸ்டார்ட் அப் நிறுவனங்களின் எண்ணிக்கை 2,045-லிருந்து 13,500-க்கும் மேலாக அதிகரித்துள்ளதாகவும் குறிப்பிட்டார். மேலும், 1.3 கோடி பெண்கள் பயன்பெறும் மகளிர் உரிமைத் தொகைத் திட்டம் மற்றும் கட்டணமில்லாப் பேருந்துப் பயணம் போன்ற திட்டங்கள் மக்களின் வாழ்வாதாரத்தை உயர்த்தியுள்ளன என்றும், இந்தத் திட்டங்களின் பயனாளிகள் வாக்களித்தாலே திமுகவின் வெற்றி உறுதி என்றும் அவர் நம்பிக்கை தெரிவித்தார். தமிழகத்திற்குள் எந்தவொரு புதிய ஏவல் அமைப்புகள் வந்தாலும் அவற்றை அனுமதிக்க மாட்டோம் என்றும், கொள்கைக்காகவே தங்களது கூட்டணி இணைந்துள்ளதாகவும் அவர் அந்த உரையில் உறுதிபடத் தெரிவித்தார்.