ரஷ்யாவில் கடந்த 146 ஆண்டுகளில் இல்லாத வகையில் மிகக் கடுமையான பனிப்பொழிவு ஏற்பட்டுள்ளது. குறிப்பாக ரஷ்யாவின் கிழக்குப் பகுதியில் அமைந்துள்ள கம்சட்கா (Kamchatka) தீபகற்பம் இந்த "பனிப் பேரழிவால்" (Snow Apocalypse) நிலைகுலைந்து போயுள்ளது.

அசுர வேகத்தில் பனிக்குவியல்கள்: கம்சட்கா பகுதியில் பனிப்பொழிவு அசுர அளவில் உள்ளது. அங்குள்ள நகரங்களில் பனிக் குவியல்கள் 10 அடி முதல் 40 அடி உயரம் வரை உயர்ந்துள்ளன. இதன் காரணமாகப் பல பகுதிகளில் நான்கு மாடி கட்டிடங்கள் வரை பனியால் முழுமையாகச் சூழப்பட்டுள்ளன.

இந்தக் கடும் குளிர் மற்றும் பனிச் சரிவு தொடர்பான விபத்துக்களில் சிக்கி இதுவரை இரண்டு பேர் உயிரிழந்துள்ளதாகத் தகவல்கள் தெரிவிக்கின்றன.


நிலைமை மிகவும் மோசமடைந்துள்ளதால், கம்சட்கா மாகாணத்தில் அவசரநிலை பிரகடனப்படுத்தப்பட்டுள்ளது. மக்களின் இயல்பு வாழ்க்கை முற்றிலுமாக முடங்கியுள்ளது.

சாலைப் போக்குவரத்து முழுமையாகத் துண்டிக்கப்பட்டுள்ளது. பல இடங்களில் மின்சாரம் இன்றி மக்கள் தவித்து வருகின்றனர். விமான நிலையங்கள் மூடப்பட்டு விமானச் சேவைகள் அனைத்தும் ரத்து செய்யப்பட்டுள்ளன.

தலைநகர் மாஸ்கோவிலும் வழக்கத்தை விட அதிக அளவில் பனி கொட்டி வருவதால், மக்கள் வீடுகளுக்குள்ளேயே முடங்கும் நிலை ஏற்பட்டுள்ளது. மீட்புப் படையினர் பனியை அகற்றும் பணியில் இரவு பகலாக ஈடுபட்டு வந்தாலும், இடைவிடாத பனிப்பொழிவு பெரும் சவாலாக உள்ளது.