தமிழக சட்டப்பேரவைக் கூட்டத்தொடரின் இறுதி நாளில், முதலமைச்சர் மு.க.ஸ்டாலினை அவரது அறையில் சந்தித்துப் பேசிய முன்னாள் முதலமைச்சர் ஓ.பன்னீர்செல்வம், இந்தச் சந்திப்பிற்கான காரணத்தை செய்தியாளர்களிடம் விளக்கியுள்ளார். கடந்த ஐந்தாண்டு கால திமுக ஆட்சியின் சாதனைகள் மக்கள் மனதில் ஆழமாகப் பதிந்துள்ளதாகவும், சிறப்பான முறையில் ஆட்சியை நிறைவு செய்துள்ள முதலமைச்சருக்கு வாழ்த்து தெரிவிக்கவே அவரை நேரில் சந்தித்ததாகவும் அவர் கூறினார். மேலும், தமிழகத்தில் மீண்டும் திமுக ஆட்சி அமைய வாய்ப்புள்ளதாகத் தெரிவித்த அவர், தனது ஆதரவு சட்டமன்ற உறுப்பினர் அய்யப்பன் சட்டப்பேரவையில் இது குறித்துப் பேசியது மக்களின் எண்ணத்தையே பிரதிபலிக்கிறது என்றார். தனது அடுத்தகட்ட அரசியல் நடவடிக்கைகள் குறித்துப் பொறுத்திருந்து பார்க்குமாறு குறிப்பிட்ட ஓ.பன்னீர்செல்வம், தற்போதைய அரசியல் சூழலில் திமுகவின் செயல்பாடுகள் தமிழகத்திற்குப் புதிய வழிகாட்டியாக அமைந்துள்ளதாகப் பாராட்டு தெரிவித்தார்.