இந்தியா மற்றும் ஐரோப்பிய யூனியன் இடையிலான வரலாற்றுச் சிறப்புமிக்க தடையற்ற வர்த்தக ஒப்பந்தப் பேச்சுவார்த்தைகள் 18 ஆண்டுகளுக்குப் பிறகு வெற்றிகரமாக நிறைவடைந்துள்ளன. டெல்லியில் பிரதமர் மோடி மற்றும் ஐரோப்பிய யூனியன் தலைவர்கள் பங்கேற்ற உச்சி மாநாட்டில் இந்த ஒப்பந்த விவரங்கள் வெளியிடப்பட்டன. இந்த ஒப்பந்தத்தின்படி, ஐரோப்பிய ஒன்றியத்திலிருந்து இந்தியாவுக்கு இறக்குமதியாகும் 96.6 சதவீதப் பொருட்களுக்கான வரிகளை இந்தியா முற்றிலுமாக நீக்க அல்லது குறைக்க ஒப்புக்கொண்டுள்ளது. இதன் மூலம் ஐரோப்பிய நிறுவனங்கள் ஆண்டுக்கு சுமார் 4 பில்லியன் யூரோ வரை சேமிக்க முடியும் என்றும், 2032-ஆம் ஆண்டிற்குள் ஐரோப்பிய நாடுகளிலிருந்து இந்தியாவுக்கான ஏற்றுமதி இரு மடங்காக அதிகரிக்கும் என்றும் எதிர்பார்க்கப்படுகிறது.

இந்த ஒப்பந்தத்தின் முக்கிய அம்சமாக, ஐரோப்பிய கார்கள் மீதான 110 சதவீத வரி படிப்படியாக 10 சதவீதமாகக் குறைக்கப்படும். மேலும், இயந்திரங்கள் மீதான 44 சதவீத வரி மற்றும் மருந்துப் பொருட்கள் மீதான 11 சதவீத வரிகள் படிப்படியாக நீக்கப்படவுள்ளன. ரசாயனங்கள் மற்றும் ஒயின்களுக்கான வரிகள் பாதியாகக் குறைக்கப்படவுள்ளதோடு, ஆலிவ் எண்ணெய் மற்றும் ஆட்டோ உதிரி பாகங்கள் மீதான வரிகள் அடுத்த சில ஆண்டுகளில் முழுமையாக நீக்கப்பட உள்ளன. இதற்குப் பதிலாக, ஐரோப்பிய சந்தைகளில் இந்தியப் பொருட்களின் ஏற்றுமதிக்கான வாய்ப்புகளை விரிவுபடுத்த ஐரோப்பிய யூனியன் உறுதி அளித்துள்ளது. இந்த ஒப்பந்தம் இரு தரப்பு பொருளாதார உறவிலும் ஒரு புதிய மைல்கல்லாகக் கருதப்படுகிறது.