முகப்பு ஈரானில் போர் பதற்றம்: 10,000 இந்தியர்களை மீட்க மத்திய அரசு தீவிரம் - நாளை முதல் சிறப்பு விமானங்கள் இயக்கம்!
ஈரானில் நிலவி வரும் மோசமான பொருளாதாரச் சூழல் மற்றும் ஆட்சி மாற்றத்தைக் கோரி வெடித்துள்ள தீவிர மக்கள் போராட்டங்கள் காரணமாக, அங்குள்ள இந்தியர்களைப் பத்திரமாகத் தாயகம் அழைத்து வர இந்திய அரசு தீவிர நடவடிக்கைகளை மேற்கொண்டுள்ளது.
கடந்த இரண்டு வாரங்களாகத் தொடர்ந்து நடைபெற்று வரும் இந்தப் போராட்டங்களைக் கட்டுப்படுத்த ஈரான் பாதுகாப்புப் படையினர் நடத்திய துப்பாக்கிச் சூடு மற்றும் தாக்குதல்களில் உயிரிழந்தவர்களின் எண்ணிக்கை 3,400-ஐ கடந்துள்ளதாகத் தகவல்கள் தெரிவிக்கின்றன.
இத்தகைய பதற்றமான மற்றும் பாதுகாப்பு அற்ற சூழலைக் கருத்தில் கொண்டு, ஈரானில் தங்கியுள்ள இந்திய மாணவர்கள், யாத்ரீகர்கள், சுற்றுலாப் பயணிகள் மற்றும் வணிகர்கள் என அனைவரும் உடனடியாக அந்நாட்டை விட்டு வெளியேறுமாறு மத்திய அரசு அறிவுறுத்தியுள்ளது.
அங்கு சுமார் 10,000-க்கும் மேற்பட்ட இந்தியர்கள் இருக்கும் நிலையில், அவர்களை மீட்கும் பணிகளுக்காக வெள்ளிக்கிழமை (ஜனவரி 16) முதல் சிறப்பு விமானங்கள் இயக்கப்பட உள்ளன. ஈரானில் தற்போது இணையதளச் சேவைகள் முடக்கப்பட்டிருப்பதாலும் தொலைத்தொடர்பு வசதிகள் துண்டிக்கப்பட்டிருப்பதாலும், அங்குள்ள இந்தியர்களைத் தொடர்பு கொண்டு ஒருங்கிணைப்பதில் சவால்கள் நிலவுகின்றன. இருப்பினும், முதற்கட்டமாக அங்குள்ள இந்திய மாணவர்களைப் பாதுகாப்பாக மீட்கத் தெஹ்ரானில் உள்ள இந்தியத் தூதரகம் அவசரகாலத் திட்டங்களை வகுத்துச் செயல்பட்டு வருகிறது. வெளியுறவுத்துறை அமைச்சர் எஸ். ஜெய்சங்கர் ஈரான் வெளியுறவு அமைச்சருடன் இது குறித்துப் பேச்சுவார்த்தை நடத்தியுள்ள நிலையில், இந்தியர்கள் போராட்ட இடங்களுக்குச் செல்ல வேண்டாம் என்றும் தூதரகத்தின் அறிவுறுத்தல்களைப் பின்பற்றுமாறும் கேட்டுக்கொள்ளப்பட்டுள்ளனர்.
