தமிழகத்தில் தேர்தல் களம் சூடுபிடிக்கத் தொடங்கியுள்ள நிலையில், திமுக கூட்டணியில் காங்கிரஸின் நிலைப்பாடு மற்றும் தற்போதைய எம்.எல்.ஏ-க்களின் கள நிலவரம் குறித்து ஆராய டெல்லியில் இந்த முக்கிய
ஆலோசனைக் கூட்டம் நடைபெற்றது.

கூட்டத்தில் பங்கேற்ற தமிழக காங்கிரஸ் எம்.எல்.ஏ-க்கள் பலரும், தங்கள் தொகுதியில் செல்வாக்குடன் இருப்பதாக ராகுல் காந்தியிடம் தெரிவித்தனர். ஆனால், ராகுல் காந்தி தன்வசம் வைத்திருந்த நவீன சர்வே முடிவுகளை முன்வைத்தார். அதில், சுமார் 70% சட்டமன்ற உறுப்பினர்கள் மீண்டும் வெற்றி பெறுவது கடினம் என்ற கசப்பான உண்மையை ஆதாரங்களுடன் சுட்டிக்காட்டினார். இது மாநில நிர்வாகிகளிடையே பெரும் சலசலப்பை ஏற்படுத்தியுள்ளது.

திமுக கூட்டணியில் நீடிப்பதன் நன்மைகள் ஒருபுறம் விவாதிக்கப்பட்டாலும், நடிகர் விஜய்யின் தமிழக வெற்றிக் கழகம் (TVK) போன்ற புதிய சக்திகளுடன் இணைந்தால் காங்கிரசுக்கு கிடைக்கக்கூடிய வாய்ப்புகள் குறித்தும் ராகுல் காந்தி விரிவாகக் கேட்டறிந்தார்.

மேல்மட்டத்தில் கூட்டணி வலுவாகத் தெரிந்தாலும், கிராமப்புற மற்றும் நகரப்புற அடிமட்டத் தொண்டர்களிடையே திமுக - காங்கிரஸ் இடையே சரியான ஒருங்கிணைப்பு இல்லை என்பதை ராகுல் கவனித்துள்ளார். குறிப்பாக ஒரு முன்னாள் எம்.பி இதுகுறித்த புகாரை வலுவாகப் பதிவு செய்துள்ளார்.


வெறும் கூட்டணி கட்சியாக இல்லாமல், தமிழகத்தில் ஆட்சியில் பங்கு (Power Sharing) பெற வேண்டும் என்பதில் மேலிடம் தீவிரமாக உள்ளது. இது தொடர்பாக திமுக தலைமைக்குச் செய்தி அனுப்பப்பட்டுள்ளது.

டெல்லி பயணத்தின் நீட்டிப்பு மற்றும் பொங்கல் பண்டிகை காரணமாக, சென்னையில் நடைபெறவிருந்த கட்சியின் முக்கியச் செயற்குழு கூட்டம் ஒரு நாள் தள்ளி வைக்கப்பட்டது.