தமிழக முதல்வர் மு.க. ஸ்டாலின் தலைமையில் இன்று (பிப். 23) நடைபெற்ற அமைச்சரவைக் கூட்டத்தில், மாநிலத்தின் தொழில் வளர்ச்சியை மேம்படுத்தும் வகையில் பல்வேறு முக்கிய முடிவுகள் எடுக்கப்பட்டுள்ளன. குறிப்பாக, ரூ. 31,502 கோடி மதிப்பிலான 46 புதிய தொழில் திட்டங்களுக்கு ஒப்புதல் வழங்கப்பட்டுள்ளது. இதன் மூலம் புதிய தொழிற்சாலைகளை நிறுவுவதற்கும், ஏற்கனவே செயல்பட்டு வரும் நிறுவனங்களை விரிவாக்கம் செய்வதற்கும் வழிவகை செய்யப்பட்டுள்ளது. இந்த முதலீடுகள் மூலம் ஆயிரக்கணக்கானோருக்கு வேலைவாய்ப்பு கிடைக்கும் என எதிர்பார்க்கப்படுகிறது. மேலும், மகளிர் உரிமைத் தொகை பெற்று வரும் பெண்களுக்கு கோடை கால சிறப்புத் தொகையுடன் சேர்த்து மொத்தம் ரூ. 5,000 வழங்குவது உள்ளிட்ட இடைக்கால பட்ஜெட்டில் அறிவிக்கப்பட்ட பல்வேறு நலத்திட்டங்களுக்கும் இந்த அமைச்சரவைக் கூட்டத்தில் அதிகாரப்பூர்வ ஒப்புதல் அளிக்கப்பட்டுள்ளது.