வங்காளதேசத்தில் கடந்த பிப்ரவரி 12-ஆம் தேதி நடைபெற்ற 13-வது பொதுத்தேர்தலில், வங்காளதேச தேசியவாத கட்சி (BNP) கூட்டணி 212 இடங்களைக் கைப்பற்றி அபார வெற்றி பெற்றுள்ளது.


இதன் மூலம் தாரிக் ரஹ்மான் புதிய பிரதமராகத் தேர்ந்தெடுக்கப்பட்டுள்ளார்; அவரது புதிய அமைச்சரவை பிப்ரவரி 17-ஆம் தேதி பதவியேற்க உள்ளது.

இந்த நிலையில், நாராயண்கஞ்ச் நகரின் ரூப்கஞ்ச் பகுதியில் புதிதாகக் கட்டி முடிக்கப்பட்ட பி.என்.பி. கட்சி அலுவலகம் ஒன்றிற்கு மர்ம நபர்கள் தீ வைத்துள்ளனர். ஜன்னல் கண்ணாடிகளை உடைத்து பெட்ரோல் குண்டுகளை வீசி நடத்தப்பட்ட இந்தத் தாக்குதலில், அலுவலகத்திலிருந்த நாற்காலிகள் உள்ளிட்ட பொருட்கள் தீயில் எரிந்து நாசமாகின. அரசியல் எதிரிகளால் இந்தத் தாக்குதல் நடத்தப்பட்டிருக்கலாம் என்று அக்கட்சியினர் குற்றம் சாட்டியுள்ள நிலையில், இது தொடர்பாகச் சந்தேகத்திற்குரிய இரண்டு நபர்களைக் காவல்துறையினர் பிடித்து விசாரணை நடத்தி வருகின்றனர்.