ஆப்கானிஸ்தானின் நங்கர்ஹார் மற்றும் பாக்டிகா ஆகிய எல்லைப் பகுதிகளில் பாகிஸ்தான் ஆயுதப்படைகள் அண்மையில் வான்வழித் தாக்குதல்களை நடத்தின. புனித ரமலான் மாதத்தில் நடத்தப்பட்ட இந்த பயங்கரத் தாக்குதலில் பெண்கள் மற்றும் குழந்தைகள் உட்பட 15-க்கும் மேற்பட்ட பொதுமக்கள் உயிரிழந்தனர். இந்தச் சம்பவத்திற்கு இந்தியா தனது பலத்த கண்டனத்தைப் பதிவு செய்துள்ளது. இது குறித்துப் பேசிய இந்திய வெளியுறவு அமைச்சகத்தின் செய்தித் தொடர்பாளர் ரந்தீர் ஜெய்ஸ்வால், அப்பாவிப் பொதுமக்கள் கொல்லப்பட்ட பாகிஸ்தானின் இந்த வான்வழித் தாக்குதலை இந்தியா வன்மையாகக் கண்டிப்பதாகத் தெரிவித்தார். இரு நாடுகளுக்கும் இடையே எல்லைப் பதற்றங்கள் அதிகரித்து வரும் சூழலில், பாகிஸ்தானின் இத்தகைய அத்துமீறிய நடவடிக்கை பிராந்திய அமைதிக்குக் குந்தகம் விளைவிப்பதாக அமைந்துள்ளது.